مولانا طارق جمیل کی خدمت میں کھلا خط

آج کل آپ کی تعریف میں کافی قصیدے لکھے جا رہے ہیں اور ہر دوسرا کالم نگار حضرت کی عامر خان کے ساتھ “انٹریکشن” کو بیان کرتا پھرتا ہے۔ میرے کچھ سوالات ہیں اور کچھ اعتراضات۔ جن دوستوں نے مولانا کی ویڈیو دیکھی ہے وہ جواب دے سکتے ہیں۔

 پہلا تو یہ کہ آپ کو اخلاقی طور پر بالکل بھی زیب نہیں دیتا تھا کہ وہ ایک شخص کے ساتھ اپنی ذاتی انٹریکشن کو پبلک میں اسکی اجازت کے بغیر بیان کر رہے ہیں۔ دوسری جس بات پر مجھے اعتراض ہے وہ یہ ہے کہ آپ کے ہر لفظ سے ایک خدائی غرور جھلک رہا ہے اور آپ کسی صورت بھی عامر خان کو اپنے آپ سے بہتر انسان سمجھنے کے لئیے آمادہ نہیں ہیں نہ تو فلمی شعبہ کے حوالے سے اور نہ ہی دینی شعبے کے حوالے سے۔ جبکہ مسلسل اس بات پر بھی اشد اصرار کر رہے ہیں کہ وہ ایک اہم آدمی ہے اور اس سے ملاقات کو باعث تفاخر بھی سمجھ رہے ہیں جیسا کہ عموما تبلیغی حضرات کرتے ہیں۔ سعید انور، یوسف یوحنا سے سلطان گولڈن اور شاہد آفریدی تک کی سیلیبرٹیز آپ لوگوں کا ٹریڈ مارک بن چکی ہیں اور باقاعدہ طور پر خواص میں جرنیلوں، بڑے گورنمنٹ آفیسروں اور اہم سیاستدانوں کے ہم پلہ ہی اہم جگہوں پر ایڈورٹائز کی جاتی ہیں۔

 مولانا آپ کو یہ بھی برا لگ رہا ہے کہ آپ عامر خان کی “حرام” فلم کی کامیابی کے لئیے کیونکر دعا فرمائیں۔ اسکے ساتھ آپ اسکا دل بھی نہیں دکھانا چاہتے۔ لیکن ایک مجمع میں یہ بات کر کے اپنی بڑائی بھی بیان کر رہے ہیں۔ حضور اب اگر عامر خان آپ کی یہ گفتگو سنے گا تو آپ کی کیا عزت رہ جائے گی؟ مجھے ایک دو دفعہ آپکو ڈائریکٹ سننے کا اتفاق ہوا ہے، اگر آپکے مقلدین نصرت جاوید کی طرح مجھے بھی نہ رگڑیں تو ایک عرض کروں؟ آپ کے لہجے میں مجھے شیرینی، محبت اور نصیحت کبھی نظر نہیں آئی۔ بلکہ رعونت، غرور، تکبر اور خدائی جلال کی نقل اور شور ہی نظر آیا ہے۔ جبکہ آپ اور آپ کے ہم پلہ و پیالہ فرماتے ہیں کہ تکبر خدا کو پسند نہیں۔ 

 برائے مہربانی لوگوں کے تقویٰ کا فیصلہ خدا پر چھوڑ دیں۔ مزید براں، آپ نے اپنی MBBS کی ڈگری چھوڑ کر کسی پر احسان نہیں فرمایا۔ ایک غریب آدمی ایسا نہیں کر سکتا، جو اپنی دیہاڑی، ریڑہی اور نوکری چھوڑ کر سہ روزوں، چلوں اور سال کے دوروں پر جاتے ہیں، انکی نہ تو جائیدادیں ہوتی ہیں اور نہ ہی اہل و عیال کے کفیل۔ وہ اپنی آخرت کے چکر میں کافی لوگوں کی دنیاوی پریشانی کا باعث بن رہے ہوتے ہیں۔

 والسلام،

 ایک خیر خواہ

 عاکف خان

Click Here to See the Video of Tariq Jamil
This article is also published at Rationalist Society of Pakistan's Blog. 

Post by Akif Khan.